رواية جديدة للكاتبة رَضْوَى الأَسْوَد عن مذابح الأرمن.

كتبت رَضْوَى الأَسْوَد في صفحتها

“الحمد لله رب العالمين.. بعد أيام ستصدر روايتي الخامسة “بالأمس كنت ميتًا”، واللي بعتبرها نقلة نوعية ليا.
الرواية دي كتبتها تقريبا في سنة، وانتهيت من كتابتها من اكتر من تلات سنين.. بتكلم فيها عن مذابح الأرمن.. عن تاريخ آخر دموي للدولة العثمانية. وعن علاقة الكرد بالأرمن من جهة، وبالدولة العثمانية من جهة أخرى.
دفعني لكتابتها صورة من أشهر وأبشع صور المذبحة.. كانت لسيدات من الأرمن مشبوحات عرايا فوق الصلبان الخشبية.
كان في ذهني ساعتها كتابة رواية يكون بطلها الرئيسي ضابط فاسد في جهاز سيادي، بس فجأة، وبعد الصورة دي، لقيت الشخصيات والأحداث بتنط في دماغي وكأنها نفحة من نفحات الإله، بس ما اتخلتش عن الضابط بردو، وقدرت استخدمه وأوظفه بشكل أحسبه جيد.
الرواية دي بحسها أعز ولادي.. هي بالذات هيفضل ليها طعمها وظروفها الخاصة جدا.
أولا عايزه اشكر الأصدقاء العزاز جدا.. أول ناس قرت الرواية، و ادوني تشجيع ودعم غير عادي، ودفعوني دفع عشان أسارع بنشرها .. لكن طبعا كل شئ بأوان.
كمان عايزه أشكر الدار المصرية اللبنانية، وتحديدًا نرمين رشاد على دعمها غير المحدود، وسعة صدرها، وتفهمها، وديمقراطيتها معايا، عشان تطلع الرواية في أفضل وأبهى صورة.
وأخيرا بقى عايزه اقول لمصمم الغلاف عمرو الكفراوي، صديق الطفولة، وابن الغاليين، شكرا جدا يا عمرو وتسلم إيدك.”